KESAH-KESAH BEBASA SANGAU PAK ALUI ILANK PERAWU (2) (serota posant-posant moral di dalam ah)

Oleh : Amrin Zuraidi Rawansyah

NGABAK:
Terima’ kasih kula ucap ke gala menyadi’ yang dah ngija-maca bagiant Pak Alui Ilank Perawu (1). Piak gak dangan segala penapat, petanya’ dan tama’an-tama’an yang disampai ke kula. Terima’ kasih. Entik ada menyadi’ nang penda maca, sila baca doluk. Bukan apai-apai… Si‘ tereti, si’ tepaham, ngapai di bagiant tu’, tingkah polah Pak Alui tawu jadi macam pituk…
Okehhh… menyadi’… sila maca…


KESAH:
Jadi piya’ am gala menyadi’ tecinta di onai pun berada. Kajah miker perawu ah nang ilank lonyampt, Pak Alui sampai tetidu’-tidu’ di lantai jamanth. Urangk-urangk nang lalu lintu kamat lobuh, nang be-entanam di pantai ai’, nang mani’ di jamanth ili’- di jamanth ulu, nebiak-nebiak nang belimur (enti’ tuju mani’=belimur, mada kelugi mani’=jualmur?)… mada nyaruh dangan gala tebeat Pak Alui.
Buh, menyadi’. Menyadi’ namah kula nerintigkh sentuwa nya’…

Biar ari panas jejolak, panas nang tawu molah bulu mata layu’, Pak Alui saja sedap ja’ em tidu’. Biar ada gala spet, motor tamangkh, kapal banongkh nang lalu, enya saja sedap beguruh. Biar gala nebiak mani’ engkabur, be-unyar-unyar, bepangkas gala pangan ah, bemaingk “anyongkh tapah”, bemaingk “anangkh antu”, sampai tepancik ai’ ke muka ah… saja mesi’ pengaruh. Tetaaaa…a..a..ap ja’ em enya telontangkh di lantai jamanth, lengkap sempurna dangan mulut ah nang tenganga’-nganga’, upa tempayant simpak nantai ai’ ujant di pecucur atap. Meski piya’, sebonar ah ada tujuh puluh tiga pekara nang tawu molah Pak Alui tebangun. Tapi, gala panas jejolak, bungi spet, tepancik ai’, ajomph temasok dalam tujuh puluh tiga pekara nyak.

Ngapai tawu upa piya’? Sampai kini tu’, siku’pun urangk, mesi’ nang bebonar entawu ah. Dari angkat bujangk mari’ tih, dah piya’ am “Pak Alui punya model”. Mula sih, gala urangk tuwa, Ini’ Ato’, Neang, Muyang, gala merina somangh, merina “yang sedang-sedang saja”, merina jauh sampai merina nang jauuuh sekali, kala’ mawa’ enya be-entama. Mada mampan! Mada siku’ dua’ dukun tabib yang nerai ngobat ah, malah bebalik belajar dua’ enya.

Waeee…lerrrr… apai dalel mengata? Saja maaa… aneh ah.

Aneh pertama, enya keniri’ mada entawu koti cara entama diri’ah keniri’, apai lagik entama urangk? Kala’ enya sakik porut, bangat gila’ ngumai ubi manta’. Begolongk icongk, tepangkas ngis enya nogar penyakik ah nyak… tetawu, dibori’ Pak Migu’ pel ponay merek bangaw, nang diboli antongk Acek Apot, tawu panai langsongk baik. Dah nya’, apai pun jenis penyakik, mulai dari batok-sonangkh sampai domam-tabingkh… suti’ em boat, eh, obat nang enya pinum: eng… ing.. eng… pel ponay merek bangaw! Annn… pia’ baka, apai nang dipelajar gala dukun tabib dari enya?

Aneh kedua’, Pak Alui ngerasa keniri’, mada kala’ konak bokal, mada kala’ melajar elmu penawu macam piya’. Mada kala’ ga’ kona’ aga’ gala antu jolu, baik di alam nyata mau’ pun di alam mimpi. Antu jolu nang tiba-tiba mugut bawu enya, dangan suara upa urangk nyanyi seriosa madah: “Wahai Pak Alui… karena engkau sangatlah lawar… engkau kami pilih menjadi indonesian aidol…” Nah, biasa ah kan, gala dukun tabib, upa piya’ napat gala elmu penawu entama urangk. Enti’ bulih dari belajar dangan urangk nang lobih tuwa dan tawu, elmu penawu nyak’ asi diturunth ke urangk laint. Pi, enti’ napat dari mimpi, elmu nya’ jom tawu dipelajar urangk laint. Kona’ ke Pak Alui, dua’-dua’ cara nyak mesi’ nang tekona’ ah. Usah kan kona’, ngenes ga’ mada. Tapi ngapai gala dukun tabib ada nang belajar dangan enya? Teros, dari urangk nang malar tidu’ ketidu’ ja’ em tebeat ah nya’, koti bah sebonar ah cara sida’ ah belajar? Apaikah sida’ ah namah tidu’ ga’?

Enti’ sesama tidu’, koti transper op kenolet (transfer of knowledge…basa urangk ingg(R)is) tejadi? Tidu’ dangan pala’ ketomu pala’? Lalu dari ubunth-ubunth keluar sinyal inprared? Enti’ piya’, ajom ja’ elmu penawu nang bepinah. Sebale ah, gala ketombe, gala kutu, bahkan enti’ ada nang nyempunth ngingun kocai di ramut, temasok gala kuris dan gala langkar pun panai ga’ bepinah. Atau tidu’ bekadap-kadap? Atau tidu’ barangk ngari angar ah? Lalu sida’ mugut peletut si’ tesamongkh sinyal belutut (bluetooth)? Tenyata ajomph piya’, menyadi’. Ajomph piya’. Upa-upa tih sederhana ja’ em.

Pi menyadi’ bayah madah sopai’sopai’. Tu’ temasok resia negara nang peri peri peri sekrit. Liat, tiga kali peri. Jadi, pekara tuk bukanth pekara barangkh ngari. Kita ami’ contoh nang teraher ja’. Di kampongk Pak Alui, ada urangkh panai benama Sila Bembeng. Gosa’ enya bunsu, maka dikiaw-lah sebagai Pak Su Sila Bembeng. Gosa’ pala’ ah tang malar ja’ telele’-lele’, upa karongkh goni lebe’, enya mendapat jenang Si Lebe’. Pengomong ah mada lain: “ Teros ja’…! Teros ja’…! Teros ja’…!”

Enya tu’… eh, mali’ madah enya, tulah. Tepat ah sentuwa. Sentuwa tu’dah sekali periode menjabat Kepala’ Kampongh. Tarep tu’ corat gi’ na’ jadi kepala’ kampongh. Sopai nang kona rudu ah? Tepat, menyadi’. Pak Alui kita nya’ am nang kona’ rudu ah. “Bagaimana” koti sentuwa nyak ngerudu Pak Alui serota ngamik elmu penawu si’ tecapai arap dan corat di ati? Su Sila Bembeng bejenang Si Lebe’, ngorah Pak Alui beramih bansa semalamph dua’ di pelaman enya. Nang bekerja, betobas, be-entanam, besemaingt gala jolu, ya Si Lebe’ ah keniri’. Pak Alui jarangkh beginsik dari dangau. Sekali sekala, Si Lebe’ belopa, encilik Pak Alui dah tiduk kah penda.

Enti’ tidu’, belubah enya ke dangau. Dudok somangkh Pak Alui nang tetidu’. Pura’-pura’ samel ngilingk mako cap disiplin, enya merati tingkah polah tidu’ Pak Alui. Upa-upa ah, Pak Alui nang biasa lasak, malar melar kia’-kitu’ (minyamph jantuh Sekadau kik), tawu pas tidu’ di pelaman Si Lebe’, tang diam ja’ em tubuh ah. Bujur. Saja upa tungul di tongah uma. Reti ah, piker Si Lebe’, aku harus kona’ numur urut satu kola’, pas pemilihan. Koti pun cara ah. Temasok ngelakar. Penda lama’ udah nyak, Pak Alui tesenyum. Kerayak Si Lebe’. Asa-asa ah… kala’ enya ngeronong senyum upa piya’. Oh… awuk… senyum sentuwa nang ada di lamar duet lima’ puluh ribu mari’ tih. Jadi, simpul Si Lebe’, aku harus bebokal duet bangat. Kolak tingal sentayar konai nang perlu. Penda lama dah nyak, Pak Alui ngunsok mata. Dah nyak digunsok ah lagi. Di gunsok ah lagi. Apai reti ah? Pojam mata koti tawu kemponan?... Oh, Si Lebe’ ngami’ kata keputus, kolak aku harus nyedia bangat mata-mata. Nah, Menyadi’… koti asel Pak Alui beramih nyak? Tontulah atas takder dari Yang Maha Kuasa, Su Sila Bembeng begelar Si Lebe’ tepilih lagi’ jadi kepala’ kampongk. Tapi bagi Si Lebe’, enya tawu berasel pun gosa’ napser tidu’ Pak Alui.
Tapi saat tu’, apai nang di tapser dari tidu’ Pak Alui di lantingh jamanth? Ba’ liat. Ajomph gi’ telontangk, tu’ enya tidu’ sengiringk ngadap kili’ samel ngokap amingkh. Gala nebiak nang belimur dah kolas gala kulik, gala jari’sampai ke gala eng###ut. Mirah kangah igik mata. Mada ulih gi’ be-unyar pangan. Sida’ dah ngamik poca’ baju siap pulangk. Pas niti panti, sida’ ngeronong ada urangk di lobuh. Bediri dan siap nurunt tanga’ kenamingkh…

Empurrrrrrr….!!!

Gala nebiak, mada bepadah pangan langsongk engkabur. Apai nang tejadi? Tenyata, Menyadi’ … togal lagik Pak Alui pesti tebangun. Pesti em. Gosak, nang turun dari tanga’ kenamingkh nyak adalah temasok pekara yang tawu molah Pak Alui tebangun. Ajom pekara semarangk pekara, tu’ pekara numur tigabelas: Umak Alui.

NUTUP:
Annn…gala Menyadi’…dah cidor lagi’ em mata tu’. Kolak kita samongk lagi’ bah. Bayah lupa’ gala penapat. Koti cara kula nulis kata mengata dalam kesah tu’? “Berbeza” dari nang sependa-sependa, kan? Koti menurut Menyadi’, nai nyaman maca ah, nang dolu’ kah nang tu’?

POSANTH MORAL:
Enti’ na’ tidu’, bayah barangkh ngari. Saja siap kih gala model pegaya. Sopai entawu ada nang merati, corat na’ napser-na’wel pegaya tidu’ kita. Yang pesti, ada dua’ nang malar merati: nyamongkh dangan empijik.

3 comments:

  1. wah ternyata saya yg pertamaaxx nich

    ReplyDelete
  2. mengamankan yg keduaaxx

    sebuah kisah yg ok nih, saya sampai 2 kali baca sambil mencoba mengerti bahasa2nya, ternyata asyik juga yaa..

    ReplyDelete
  3. @rumah blogger : Makasih udah mo mampir, saya sibuk akhir-akhir ini hingga jarang blogwalking. @Sabirinnet : Makasih atas atensinya Sob, Sebenarnya ini merupakan hasil karya adik saya, dalam bahasa Melayu Sanggau. Kedepannya, saya coba menulisnya dalam versi Bahasa Indonesia. Sekali lagi, terima kasih

    ReplyDelete

Makasih udah mampir dan kasih komentar ....