KESAH-KESAH BEBASA SANGAU: PAK ALUI ILAKNG PERAWAU (3) Serota posatn-posatn moral di dalam ah

Oleh : Amrin Zuraidi Rawansyah

NGABAK:
Ngapai gala nebiak nang pulakng belimur, pas niti panti tetiba engkabur?... okehhh… saja betol am jawab Menyadik'. Gosa’ ngeronong Umak Alui nurutnh tanga’ kenamikng.


Nah, enti’ kula nanya’ lagi’, apai pasal Umak Alui nang nurutnh tanga’ kenaminkng tawu molah sida’ engkabur?... Awu’. Saja bonar lagi’ am jawab menyadi’. Gosa’ Umak Alui temasok pekara nang tawu molah Pak Alui tebangun dari tidu’ ah.

Numur beropai, Menyadik' ?... Ennn… Kona’ lagi’ am. Saja pemanai-manai ah deh. Dari tujuh puluh tiga pekara nang tawu molah Pak Alui tebangun, Umak Alui pas tepat dinumur keramatnh: TIGA BELASSS…


KESAH:
Jadi piya’ em tih, Menyadik'…
Ari masih panas jejolak. Mata ari memang dah beginser sikit ke ili’, dah tawu molah kemayakng gala jolu. Urakng-urakng di lobuh pun siku’ dua’ masih ada nang lalu lintu. Spet panyakng beterpal ijau, bemesetnh empat puluh peka, dipasakng begimar, laju mudik ke ulu. Gelumakngh ah bosar, beunyar-unyar ngaga’ ke pantai. Gala jamatnh beguncakng. Sengirikng kiba’, sengirikng kanan. Tegelek-gelek. Untokng kuat gala paku-memaku, kobat- mengobat sampai ke gala sapat-menyapat ah… entik mada, rempe’.

Umak Alui bediri di pala’ tanga’ kenamikng. Ramut ah nang panyakng, nang biasa rapi disangul atau bekobat gotah golakng, tu’ rinsai remuai. Empadai ciup angin dari arah sungai, ramut ah bekibar-kibar upa poca’ rangkai di kelompai.

Tapih anyokngh ah warna cekelat. Dah agak pudar. Biar piya’, motip ah masih keronong, motip bunga torokng. Come’ empadai tanah. (Sekedar ngingat ja’ em, Umak Alui dangan Alui saja baru’ am nalaw Dabalyubus yang engkasak idak gosa’ ngerudu kayu’ kelotok di belakakng rumah. Sompat betiga’ terajakng ga’ am sida’ nyanak nya’. Koti ajom nak betiga’ terajakng, pas sida’ nyanak nalaw Dabalyubus, Kelinton malar ngeraru. Lengah sikik, ada ja’ em enya nerai na’ ngetal idokng ah ke burik…)

Baju nang dipakai Umak Alui baju kaus mirah kangah. (Untokng dah lalu sonta mangkas: “Campoi’…!!!”). Baju ah nya’, di adap, ada gamar urakng ngerenyeng. Di bawah gamar, ada tetulis nama urakng nang ngerenyeng nya’. Nama ah si’ penek am. Saja setotak. Tapiii… piak kanan tana koma… rebbanalerrr… yang nama ah gelar, mada tawu nak madah gi’, Menyadik': betepe’-tepe’. Ada es-ha, es-e, es-sos, es-pe, es-pede, es-age, es-te dan seteros ah sampai ke es-kampel. Nya’ baru totay gelar be-urup es, Menyadik'. Totay gelar be-urup em ada lagi’. Mulai dari em-ha, em-e, em-te, em-em dan seteros ah sampai ke gelar paling tingi’: em-pitaw.

Di belakankng baju, ada gamar kotak-kotak, kotak-kotak nya’ be-isi’ numur-numur dangan nama-nama. Suti’ numur di kotak kiba’, bepasakng dangan suti’ nama di kotak kanan. Nama si ngerenyeng, upa-upa ah ditulis palikng luncit. Biar luncit, Menyadik', tapi urup ah palikng bosar. Di kotak kiba’ nama enya, numur ah dicoret dangan tana contekng. (Contekng kah contReng, no’? Ah, apai ji Om am kah. Enti’ ji Om contreng, ji kami’ sihhh…contekng…)

Awu’ am Om, eh, Menyadik'. Saja bonar bin tepat binti mada ngelipar, pekira’ Menyadik'. Sentuwa ngerenyeng di baju Umak Alui nya’, jeman pilih memilih tih, ngelaba’ diri’ ah jadi wakel rakeyat. Tepilih jopmh? Awuk-awuklah…masa’ awuk-awuk dong. Berkat apai? Upa cereta si Lebe’ Bembeng, berkat napser tidu’ Pak Alui. Nah, baju nang dipakai Umak Alui nya’ adalah tana terima kasih. Ganal-ganal suti’ nya’ ja’ em petana. Lain mada. Kenyenyaman dudok di kuresi wakel rakeyat, lupa’ ah dangan Pak Alui. Lupa’ ah dangan rakeyat nang bededorupmh nyontekng nama enya. Masih kasa Pak Su Sila Bembeng. Selain mori’ tiga iku’ kamikng ke Pak Alui, masih malar begaul dan ngorah masyarakat – mulai dari Pak Migu’, Long Toyat, Omok Jenah, Ci’ Mamot, Ngah Loren, Uju Asmara sampai ke Ocel Kan, poko’ah semua-semua urakng nang luas dan dalam pemiker, serota awas dan angas gala kelaku kerja’ – bepaham dan bepolah kay ngemaju kampokng.

Padahal Umak Alui, pas si Ngerenyeng tepilih, amu’ ati ah na’ bole’ makai baju mirah kangah pebori’ sentuwa nya’. Amper ja’ am dipajak ah dalam peti bosi di atas para’, si’ jadi barakng pesaka kay anak ucuk. Atau paling ajopmh, dipasak ke dininkng ruang tamu: kay nangkal gala antu jolu.


Pi Umak Alui kala’ ninga, si Ngerenyeng nya’ madah: “Kula tu’ mesi’ penawu kay jadi wakel mewakel. Saja beniat na’ nginser burik ja’ em bah…” Selain nya’, Umak Alui entawu, si Ngerenyeng nya’ saja berubah tabeat ah sejak jadi wakel. Lupa temunik dikubur di putnh tebodak. Lupa’ ngemaju daerah diri’ ah. Penawu ah koti notak gala anggaran pembangunan, besimat kiba’ kanan enti’ ada proyek, medo sampai nito’ pala’ urakng nang protes. Rumah ah kalah-kalah estana tuan Takur di pelam-pelam India.


Anak-anak ah sekolah, mesi’ nang di kamat situ’. Nun an kamat jawa Melaka. Siku’ anak ah malah sekolah di luar negeri, di kutub utara. Kalau ajopmh salah, sekolah penajuran enternasional. Bini ah, kalah-kalah artis holiwut. Tiap ari ke salon. Mulai dari notak ramut, krimbet, pesyel, pedikur, medikur, botok, sampai minta’ pala’ ah di catok. Belanya, tobat haram ah kamat sentral atau pasar senggol. Paling hina bagi enya, belanja di Megamol pentanak nun an. Tiap mingu peleser belanya ke singapur. Domam sikik atau hanya bebadal kona’ kotup soputnh, berobat ke kucing melesia. Masih di kampokng mari’ tih, besapa laki bini apak umak ja’ em. Tu’… tepapa-papa…temama-mama… papa nggak pulang beibe…

Entawu piya’, ngangat ati Umak Alui. Amu’ ati ngeramatnh baju kampanye, aher ah di pakai ah jadi poca’ baju pemogi ja’ em. Kala’ Alui mawa’ pulang lima uti’ bendera partai sentuwa ngerenyeng nyak. Niat Alui kay molah kumu’ atau sarong bantal. Tapi Umak Alui nang masih ngangat, empu’ rencana nang lobih mulia. Semua bendera nya’ di polah ah jadi poca’ pengurapmh. Ennn… ngajar ah, no’?

Jadi piya’ em tih, Menyadik'. Umak Alui kalau dah ngangat, aneh menganeh kelaku ah. Maka ajom heran gala nebiak engkabur ngeliat enya bediri di pala’ tanga’ kenamikng. Entik’ Menyadik' masih ingat pelam nebiak yang dipolah jepang mari’ tih, urakng jagor benama MEGALOMAN, nang kibas ramut ah tawu jadi api, molah salokng gala monster, kurang lobih piya’ em angar ah baka umakng Umak Alui di mata nebiak nang engkabur nya’. Kosal bedabal ati megaloman mantau monster tidu’ di lantinkng jamatnh. Eh, maksud kula, kosal bedabal Umak Alui alui mantau Pak Alui nang tetidu’ di jamatnh. Ajomkah tadi’, piker Umak Alui, laki kuh nya’ ku minta’ rela moli se-hap bences antokng toke Amiau? Ngapai tau jadi tidu’ di jamatnh? Ngokap amikngh lagi’… dah ga’ penda ilakng lonyap kopa’ nalaw dabalyubus, ati ah menjadi ngangat ngeliat laki ah tidu’ ajom moli bences, tu’ makin parah, ati ah manas gosa’ Pak Alui tidu’ samel ngokap amikngh. Dada ah terasa ponuh ai’ engkurak. Ati ah ngemuru. Pantas… dah beberopai lama’ tuk Pak Alui ajom upa mari’-mari’ tih.


Mari’, sikik-sikik, tecinta-cinta… tekasih-kasih… tesayang-sayang… dangan enya. Enti’ enya meraju’, Pak Alui segera moli kuyum podas. Enti’ enya nangis, mada dudi Pak Alui ngipok dengan beribu bejuta cara, mulai dari ngamik beropai uti’ anok sampai dangan nantay ai’ mata ah ke dalam derom. Enti’ enya corat nonton pelam, sangup Pak Alui bekayoh mudik ke Sangau. Nonton pelam di gedokng Theatre Daranante. (Sekadar pemadahan, sekitar tautnh lapatnh puluhan, gedokng Theatre Daranante nya’ dirubuh. Tu’, antokng nya’ dah berubah menjadi pujasera). Enti’ enya kona’ ensibatnh, segera Pak Alui nyungkik ah, mori’ obat merah, molah pereban, ngelo enya ke penidu’, beari-ari ngawan enya di penidu’ samel begesah, bekuti’, ngipas… nyuap ah enti’ enya corat makan. Mori’ minum enti’ enya aus. Padahal ajom ga’ parah upa koti ensibatnh ah nya’. Tapi kasih sayang Pak Alui saja ponuh melumpi’. Tap kini tu’…dah loju’ kah sampai-sampai harus selingkuh? Tapi nang molah ati Umak Alui asa te-iris, Pak Alui ajopm selingkuh dangan jeloma. Tapi dangan amikng!!! Sampai ati laki ah upa piya’. Mada sebela diri’ ah harus dibanikng-banikng dangan amikng yang ajom tawu apai awai nya’, ajom tawu engketek engkobut…

Jadi piya’ em tih Menyadik'. Dangan perasa mada tontu rudu, Umak Alui nurutnh tanga’ kenamikng. Belubah. Suti’ demi suti’…

NUTUP:
Sepiya’ ja’ em dolu’, Menyadik'. Kelanyut “tubikontinyut” ah masih diketak-ketek. Kula minta’ maap dan minta’ ampun gosa’ agak lat ngirum gesah nang tu’. Bukan apai, gosa’ kula lagi’ molah tapai. Eh, gosa’ kula sibuk (yarab! Sibuk? Capede…) ngerintu gala pengidup di pelaman.


Dan lagi’-lagi’ soal sinyal, tu’ kula ouw-el dari pucok keloweh. Sinyal ah ‘sayup-sayup tak sampai’. Kula nerai ngirum gesah tu’. Upa nang udah-udah, ajom setogal. Piak ga’ enti’ ada menyadi’ nang mada kona tigu’ (Kona’ jom tarjamah “tagged” menjadi tigu’?), mohon bayah murka bayah meraju’. Kula mesik kuyum podas kay ngipok. Kesalahan tidak pada layar televisi anda. Kesalahan ada pada pucok keloweh.

POSANTH MORAL:
Aminkgh, sebagai asel karya cipta gala leluhur kita, dirancang kay naroh gala babatnh borat enti’ bejalan jauh. Istilah jeman tu’, tas bekpeker. Jadi, ajom kalah dangan leluhur urakng-urakng barat. Sida’ boleh ke bulan, tapi tawu jopmh sida’ ah be-anyam? Hik2… jadi, bayah nukar pungsi amikngh nang dielo menjadi bahan pengokapan. Posanth moral yang nyata: “Amikngh bisa merusak rumah tangga.”
(Emhhh… inang-inang, rumah tanga’ gala artis ditipi nya’ rorak empaday aminkngh? Ba’ Menyadik' nanya dangan KD…)



Jika anda merasa blog ini bermanfaat dan ingin berlangganan lewat email, silahkan isi alamat email anda pada kolom yang telah disediakan. Terima Kasih:


Delivered by FeedBurner

1 comment:

Makasih udah mampir dan kasih komentar ....